Eg er så heldig å ha foreldrene mine friske og (rimeleg) raske på nabotomta. Dei stiller opp og hjelper til med det meste, og det trengs rett som det er på eit lite småbruk. I går fekk eg tøma komposten deira og pappen kom med eit hengarlass med oppkutta flis til meg.

Ferdig kompost! Eg kan ikkje koma på noko kjekkare å få akkurat no.

Sidan det er fyrste året eg har hatt tid til å tenkja på grønsakshage så er eg i underskot på jord. På sikt har eg håp om å produsera det meste her på bruket, men dei fyrste åra må eg nok handla inn noko i tillegg.

Eg blanda inn ein del av komposten til tomatene i drivhuset mens resten blei spandert på pallekarmane som nærmar seg klare for «topping» Soo fantastisk å få med litt heimalaga kompost til sesongen også!

Vidare fekk eg lagt på jorddekke rundt blåbæra mine og begynt på eit nytt gravefritt bed der eg har planar om å planta rabarbra og diverse andre nyttevekstar.

Det er så utruleg fint å få styra på ute i hagen om dagen. Kreativiteten og energien boblar og eg har 1000-prosjekt i hodet, hadde berre døgnet hatt minst 48 timar 😀

-bente-